Në një deklaratë të paprecedentë, drejtori sportiv i Lazios, Igli Tare ka folur në një orë leksioni në universitetin “Luiss” me temë me titull “Evoluimi i të drejtës sportive dhe profilit ekonomik e financiar të klubeve”.
Tare kritikoi krijimin e një sërë kompeticioneve të reja sportive si “Conference League”, duke thënë se bëhen vetëm për të shtuar të ardhurat. Ai tha se ekipe me emër si Juventus, Inter dhe Milan janë të falimentuara, por mbahen në jetë sepse “sistemi ka nevojë për to”.
Ndër të tjera Tare kritikoi edhe ndryshimin e futbollit ndërkombëtar:
“Po drejtojmë një Ferrari që herët a vonë do të përplaset. Në futboll po shpiken kompeticione të panevojshme si Conference League që është kompeticioni i humbësve apo Europa League që nuk siguron të ardhura. Është shpikur edhe Nations League që i detyron lojtarët të bëhen robotë. Për të gjeneruar më shumë të ardhura gjenerojmë edhe më shumë probleme.
Futbolli ka marrë rrugën e gabuar. Sot ka klube që edhe pse elitare në Itali si për shembull Juventus, Roma, Milan dhe Inter, teknikisht janë të falimentuara por mbahen në jetë sepse sistemi ka nevojë për to. Është shumë e rëndësishme që në një klub të bësh një plan afatgjatë menaxhimi me projekte të rëndësishme për të mirën e tyre”.
