Ish-ministri Sandër Lleshaj, duke folur në studion e “Log.” u ndal tek standardet e policisë së shtetit sot. Ai u shpreh se në asnjë vend të botës, nuk ndalohesh nga policia pa asnjë arsye, pro ndryshe ndodh në Shqipëri.
Sipas tij, policia në Shqipëri nuk ecën me logjikë dhe me dyshime, por me idenë se nëse ndalojmë sa më shumë persona do kapim persona të inkriminuar.
“Policia sot të ndalon kot. Nuk ndodh në asnjë vend të botës. Është anti koncept. Hajt se po i ndalojmë shumë se do dali diçka. Policia duhet të punojë me inteligjencë.” tha Lleshaj.
Ndërsa lidhur me dorëheqjen e drejtuesëve të institucioneve,i pyetur nëse pasardhësi i tij Bledi Çuçi duhet gjithashtu të japë dorëheqjen, ai refuzoi të komentonte, ndërsa aktin e tij e cilësoi zbatim të bindjeve të tij.
“Është aq e drejtpërdrejtë sa s’mund të marrë një përgjigje të drejtpërdrejtë kjo pyetje. Rezervohem të jap komente. Unë jam vënë përballë një situate të vështirë në dhjetorin e 2020 dhe kam marrë një akt që është i njohur. Nuk e kam marrë në funksion të dhënies së ndonjë mesazhi, por ka qenë akt i imi privat. Përgjigje ndaj bindjes time të thellë që qytetarët tek policët duhet ta shohin fytyrën e ministrit. Dhe nëse kemi devijime dhe shkelje të rënda, diçka do ta shohin nga fytyra e ministrit. Të gjitha rastet ngjajnë dhe nuk ngjajnë, në thelb asokohe kishim një akt të rëndë, vrasje që është konfirmuar edhe nga gjykata”, tha Lleshaj.
