Drejtori sportiv i Real Madrid, Emilio Butragueño u shpreh pas barazimit kundër Girona-s (1-1) në një ndeshje të vendosur nga penalltia e dyshimtë për një prekje me dorë të Asensios se “arbitrazhi ka qenë shumë i çuditshëm”.
“Jo vetëm interpretimi i atyre episodeve, e gjithë ndeshja, që nga fillimi ka qenë… e vështirë për t’u kuptuar. Nuk na pëlqen të flasim për arbitrazhe, por ajo që kemi dëshmuar sot në Bernabeu ka qenë shumë e çuditshme”, tha ai për mediat e klubit madrilen.
Butragueño e përshkroi veprimin e penalltisë së Asensio që shkaktoi golin e barazimit të Stuanit si “vendimtar” dhe diskutoi vendimin e arbitrit për të përjashtuar Toni Kroos me kartonin e dytë të verdhë.
“Skuadra është përpjekur. Me rezultatin 1-0 skuadra ka mundur të shënojë golin e dytë me atë gjuajtje të Asensio dhe më pas ka ardhur vendimi i penalltisë, që ka qenë vendimtar për të ardhmen e ndeshjes, dhe më pas përjashtimi i Kroos, i cili është rigoroz, le ta themi kështu”, tha ai.
“Është turp që nuk mundëm të fitonim sepse vinim nga një ecuri fantastike. Por ndonjëherë në futboll ka ndeshje që shkojnë në një drejtim të papritur dhe sot për fat të keq kishim gjithçka kundër vetes”, theksoi ai.
