Mesfushori i Francës, Paul Pogba, do të mungojë në Kupën e Botës në Katar, teksa vazhdon rehabilitimin nga një dëmtim në gju i pësuar në korrik.
Pogba nuk ka luajtur për Juventusin që nga ribashkimi këtë verë, pasi kishte këputur meniskun e tij në gjatë stërvitjeve para-sezonale.
Agjenti i Pogba, Rafaela Pimenta tha në një deklaratë: “Pas shqyrtimit mjekësor të djeshëm dhe të sotëm në Torino dhe Pittsburgh, është jashtëzakonisht e dhimbshme të informohet se Paul do të ketë ende nevojë për kohë rikuperimi nga operacioni i tij. Për këtë arsye, Paul nuk do të jetë në gjendje të bashkohet me Juventusin dhe as me Kombëtaren e Francës në Kupën e Botës Katar 2022”.
“Nëse mendimet e dëshiruara do t’i ndryshonin gjërat, Paul do të luante nesër. Por ajo që ndryshon gjërat janë puna e palodhur, qëndrueshmëria dhe disiplina, të gjitha këto janë të vetmet gjëra në mendjen e Paulit në këto kohë sfiduese. Pogba do të vazhdojë të punojë duke dhënë më të mirën për tu kthyer në fushë për tifozët dhe ekipin e tij sa më shpejt të jetë e mundur”.
Juventus dha një përditësim mbi gjendjen e tij të hënën pa përmendur në mënyrë eksplicite se ai do të humbiste turneun, duke thënë: “Në dritën e ekzaminimeve radiologjike të fundit dhe konsultimit të kryer në Pittsburgh nga profesor Volker Musahl për vlerësimin e gjurit të tij, Paul Pogba duhet të të vazhdojë programin e tij të rehabilitimit”.
Mesfushori konfirmoi, përmes një video të postuar në Twitter muajin e kaluar, se ai kishte pësuar një operacion të suksesshëm në një dëmtim në gju dhe shtoi se ai mbetet i fortë mendërisht pavarësisht spekulimeve rreth jetës së tij personale.
Por përditësimi i fundit vjen si një tjetër goditje për francezin, i cili ka humbur 59 ndeshje për klubin dhe kombëtaren që nga fillimi i sezonit të kaluar.
Kjo do të thotë gjithashtu se trajneri i Francës, Didier Deschamps do të jetë pa të dy mesfushorët qendrorë që luajtën finalen e Kupës së Botës në Rusi katër vjet më parë, duke pasur parasysh lajmet e fundit se N’Golo Kante do të humbasë turneun pasi iu nënshtrua një ndërhyrjeje kirurgjikale për një problem të kofshës.
