Analisti Frrok Çupi dhe shefi organizativ i PD-së Klevis Balliu janë përfshirë në një debat të ashpër në studion e Euronews.
Teksa diskutonin për udhëtimet me charter të kryeministrit Edi Rama, Klevis Balliu solli në vëmendje se janë vizat e hapura në kohën e Sali Berishës ato që mundësojnë lëvizjen e lirë e që sidoqoftë, Europa, sipas tij po kërcënon Shqipërinë se do i rikthejë përsëri vizat prej emigrimit masiv të shqiptarëve.
Për Frrok Çupin këto janë “shpifje dhe budallallëqet e dynjasë”. Në këndvështrimin e tij çfarë publikon Berisha për udhëtimet e Edi Ramës nuk duhet besuar pasi sipas tij kreu i PD-së është një “mashtrues ordiner” i cili sulmon aty ku i mbushet mendja.
“Duhet t’i hyjë Kontrolli i Lartë i Shtetit burimeve dhe shpenzimeve dhe aktiviteteve që kanë bërë ambasadat kur ka shkuar Edi Rama sepse ka pasur shishe vere nga 16 mijë euro shishja,” – u shpreh Balliu nga ana tjetër i cili përmendi shifrën 22 mijë euro si të papërballueshme për një nga popujt më të varfër të Europës.
