Portieri i Bayern Munich-ut, Manuel Neuer, ka zbuluar se është diagnostikuar me kancer të lëkurës në fytyrë, për të cilin i është nënshtruar tre operacioneve.
Gjermani është hapur për çështjet e tij të fundit mjekësore pasi lançoi një produkt të ri për kujdesin e lëkurës me yllin e tenisit Angelique Kerber.
“Ne të dy kemi një histori shumë personale kur bëhet fjalë për sëmundjet e lëkurës. Angelique ka hiperpigmentim të shkaktuar nga dielli dhe në rastin tim kancer të lëkurës në fytyrën time, të cilën më është dashur ta operoj tre herë”, tha ai në një deklaratë për shtyp.
“Kjo është arsyeja pse ne i kemi kushtuar vëmendje të veçantë garantimit që të mos bëjmë më asnjë kompromis kur bëhet fjalë për mbrojtjen nga dielli: sepse stërvitem jashtë gjatë gjithë kohës dhe gjithashtu më pëlqen ta kaloj kohën time të lirë në natyrë”.
Neuer do të rikthehet për Bayernin pasi u përjashtua nga fusha për shkak të një dëmtimi në shpatull që nga barazimi i tyre me Dortmundin në Bundesligë në fillim të tetorit.
Tifozët e Gjermanisë kishin frikë se numri 1 i portës mund të ishte një dyshim për Kupën e Botës në Katar, e cila fillon më vonë këtë muaj, por trajneri i Bayernit, Julian Nagelsmann ka konfirmuar se ai mund të luajë kundër Hertha Berlin të shtunën.
