Partizani pëson humbjen e dytë radhazi, teksa këtë herë u mund nga Laçi në transfertë. Goli i Ujkës i realizuar në minutën e 13-të u dha fitoren e tretë radhazi kurbinasve, që kanë bërë kthesën e vijojnë ngjitjen në renditje.
Bardhezinjtë ishin dukshëm më superiore, duke pasur shumë mundësi për të shënuar edhe golin e dytë. Nga ana tjetër, të kuqtë e patën të vështirë për të rrezikuar, teksa një goditje e Hotit në pjesën e dytë ishte rasti i parë serioz, ndërsa në sekondat e fundit të ndeshjes, kryeqytetasit goditën shtyllën, por pa arritur që të barazonin rezultatin.
Pas këtij takimi, Partizani zbret në vendin e dytë, duke mbetur në kuotën e 19 pikëve, ndërsa Laçi tani pozicionohet në vendin e gjashtë me 14 pikë.
Në sfidën tjetër, Tirana merr kryesimin e Abissnet Superiores, pasi mundi në “Selman Stërmasi” me rezultatin minimal Egnatian. Skuadrës së Orges Shehit i mjaftoi një gol i Patrick në pjesën e dytë, saktësisht në minutën e 51-të, për të marrë fitoren e dytë radhazi, por mbi të gjitha për t’u katapultuar në vendin e parë në Superiore.
Pjesa e parë ishte e kujdesshme dhe me pak raste, teksa mund të veçohet një goditje e Xhixhës dhe një rast i Camajt. Në pjesën e dytë, Patrick u tregua vigjilent brenda zone, duke kthyer në gol një harkim të Toshefskit. Me portën e boshatisur dhe me përgjumjen e mbrojtjes mike, 24-vjeçari nuk e pati të vështirë që të gjente rrjetën.
Skuadra rrogozhinase pati disa mundësi të mira për të shënuar, megjithatë nuk ia doli që të marrte diçka nga kjo sfidë. Në të 74-tën, Delarge arriti që të gjente rrjetën, por anësori i ndërpreu festën, duke sinjalizuar pozicion të parregullt. Me 11 pikë të grumbulluara, ekipi i Shpëtim Duros e sheh veten në vendin e pestë me 15 pikë.
