Presidenti ukrainas Volodymyr Zelenskyy ka vizituar ditën e sotme qytetin e çliruar të Khersonit. Ai u prit nga qindra banorë të rikthyer në qytet pas largimit të forcave ruse. Vizita e tij është shoqëruar me shumë emocione, qytetarët nuk i kanë mbajtur dot lotët dhe kjo shihet në pamjet e publikuara nga mediat e huaja.
Me flamuj në krah dhe duke kënduar himnin kombëtar ata i kanë rezervuar një pritje të ngrohtë liderit, i cili zgjodhi të qëndronte në vend dhe jo të largohej në momentin që nisi lufta rreth 8 muaj më parë. Dhe vetë Zelenskyy u shfaq i emocionuar gjatë kohë që kalonte në qytet nën masa të rrepta sigurie pasi sipas informacioneve nga agjensitë sekrete ka ende ushtarë rusë të fshehur në qytet.
Zelensky, i cili ka qëndruar në Ukrainë gjatë gjithë luftës, iu drejtua trupave dhe banorëve lokalë në sheshin qendror të Khersonit dhe u zotua: “Ne po ecim përpara. Ne jemi gati për paqe, paqe për vendin tonë.”
Vizita e tij në Kherson vjen disa ditë pasi forcat ruse u detyruan të tërhiqen nga qyteti jugor pas muajsh pushtimi. Zelensky falënderoi NATO-n dhe aleatët e tjerë për mbështetjen e tyre në luftën kundër Rusisë dhe tha se dorëzimi i sistemeve raketore të artilerisë me lëvizshmëri të lartë (HIMARS) nga Shtetet e Bashkuara kishte bërë një ndryshim të madh për Kievin.
