Drejtori i Përgjithshëm i Kadastrës, Artan Lame ishte në Vlorë në vijim të procesit të legalizimit të pallateve të braktisur nga ndërtuesit. Lame në krye të takimit është ndalur tek Vendimi i Qeverisë për sekuestrimin e ndërtimeve apo katet pa leje. “Ju e keni ndjekur kohët e fundit VKM që ka nxjerrë Qeveria për sekuestrimin e objekteve që kanë që kanë shkelur lejen e ndërtimit dhe kanë ndërtuar kate pa leje. Natyrisht që qëllimi i këtij vendimi është që të mos penalizojë qytetarët që kanë blerë në këto pallate dhe fakti i sotëm që ne po vazhdojmë legalizimin e pallateve e braktisura nga ndërtuesi, është një shembull që tregon një ndarje të qartë mes hallit të qytetarëve që kanë blerë një apartament apo njësi shërbimi dhe qejfit të tyre që kanë shkelur lejet dhe që duhet të paguajnë për shkeljet që kanë bërë”, tha Lame. Gjatë takimit u vu sërish në dukje problematika bazë e këtyre rasteve që kërkon që kush ka një apartament në një pallat të braktisur, duhet të bëhet bashkë me banorët e tjerë për t’i dhënë fund pasigurisë së pronës. Kjo mundësohet përmes zgjedhjes së një administratori, i cili është ai që ndërmjetëson mes banorëve dhe zyrave të Kadastrës.
Pallati ku u dhanë Vendimet e Legalizimeve është ndërtuar në vitin 2007 dhe ka 35 njësi banimi dhe shërbimi. Të gjithë ata që kanë marrë këtë vendim, pas 30 ditëve duhet të aplikojnë në e-Albania për tu pajisur me certifikatë pronësie.
Qytetet që e kanë më të theksuar këtë problematike janë Tirana, Durrësi, Vlora dhe Saranda.
Ne rastin e Vlorës, problematika rëndohet edhe prej faktit të mungesës së administratorëve të pallateve, të cilët duhet të grumbullojnë dokumentacionin fillestar të nevojshëm për procesin.
