Jemi zyrtarisht në ditën e nisjes së Kupës së Botës. Ndeshja Katar-Ekuador është sfida e cila hap këtë kompeticion të lavdishëm.
Ndjekim disa nga titujt kryesorë të mediave sportive:
La Gazzetta dello Sport ia kushton faqen e parë Kupës së Botës: “Gjithë florinjtë e botës. Turneu hapet me sfidën Katar-Ekuador dhe mbyllet një javë para Krishtlindjeve.
Corriere dello Sport hapet në lidhje me sondazhet se kush e fiton Kupën e Botës: “Ne jemi Argjentina”. 30% e lexuesve kanë zgjedhur Messin, Di Marian, Dybala dhe Lautaron, si fitues të trofeut të lavdishëm.
Tuttosport si zakonisht hapet me Juventusin: “Një Kupë Bote e çmendur për Vlahovic”. Deliri i dedikohet sulmuesit serb, pas super paraqitjes së tij në ndeshjen miqësore kundër Bahreinit.
“Një Botëror pa Benzemanë” është titulli i madrilenes AS. Sulmuesi francez nuk ia doli të rikuperohej nga dëmtimi dhe tani është zyrtarisht jashtë Kupës së Botës. Një zhgënjim i madh ky për yllin e Real Madrid, i cili po e priste me padurim këtë rrugëtim.
Prestigjiozja Marca hapet me një titull interesant: “Më 18 dhjetor mos bëni plane”. Kupa e Botës në Katar nis me 32 ekipe në kërkim të një ëndrre. Sot Katar-Ekuador në orën 17:00 është sfida hapëse.
