Kryeministri Edi Rama i ka dalë në mbrojtje homologut të tij në Kosovë pas sulmeve që iu bënë me arritjen e marrëveshjes Kosovë-Serbi për çështjen e targave. Kreu i qeverisë thotë se me arritjen e marrëveshjes, Albin Kurti është sjellë si një kryeministër duke i cilësuar si të padrejta akuzat që kanë mbërritur kundrejt tij.
“S’jam aspak dakord me sulmet ndaj Albin Kurtit pas marrëveshjes së duhur që fatmirësisht mbylli shtegun e rihapur të zhvillimeve të paparashikueshme! Ta sulmosh Albinin pse u soll si kryeministër është njësoj si t’i kërkosh hesap pse nuk mendon e flet njësoj si kur ishte në burg”, tha Rama.
Ky reagim vjen pasi opozita në Kosovë e kanë etiketuar Kurtin si “tradhtar”, e ndërsa jo më larg se sot, ai u godit me qershi nga Partia Socialdemokrate.
Pas më shumë se 6 orësh në negociata, dy kryenegociatorët e Serbisë dhe Kosovës ranë dakord për zbatimin e një marrëveshjeje, me ndihmë të shefit të diplomacisë së BE-së, Borrell. Marrëveshja përmban ndalimin e lëshimit të targave me emërtimet e qyteteve të Kosovës nga ana e Serbisë. Nga ana tjetër, Kosova do të ndërpresë ndalimin e automjeteve serbe në kufi duke mos i detyruar për të kryer riregjistrim të mjeteve. Marrëveshja është pritur mirë edhe nga Shtetet e Bashkuara, sipas të cilave, dakordësia shmangu përshkallëzimin e tensioneve.
