Kreu i LZHK-së, Dashamir Shehi thotë se rezultatet e reformës në drejtësi janë shumë pak e si pasojë ambienti është zhgënjyes.
“Po çfarë pret qytetari pas kaq vjetëve? Që me gjithë mend të dënohen ca, realisht,” – u shpreh Shehi në “Now me Erla Mëhillin”.
Kreu i LZHK-së, Dashamir Shehi, ka folur për zhgënjimin e qytetarëve tek Reforma në Drejtësi dhe tek institucionet e drejtësisë.
Ai deklaroi se tashmë është bërë baltë, pasi theksoi se rezultatet e drejtësisë kanë qenë reletivisht të vogla.
“Drejtësia në një shtet nuk është vetëm drejtësia ligjore. Ka disa lloj drejtësish. Drejtësia e opinionit, material, ka 100 mijë drejtësi, por kjo është shkalla e fundit, superiore e të gjithë sistemeve të drejtësisë dhe ne që e kemi bërë baltë si gjithë pjesën tjetër të shtetit, kemi pritur që po ndodh me gjithë mend diçka. Se korrupsioni është aq i dukshëm, aq i madh, sa në qoftë se nuk kapen edhe tani, atëherë më fal po për çfarë po merremi? Kjo e ka bërë, pritshmëria e lartë dhe rezultatet relativisht të vogla kanë bërë që njerëzit të zhgënjehen”, u shpreh kreu i LZHK-së.
Shehi theksoi se njerëzit po presin që të paktën të vihen para përgjegjësisë disa ‘drunj të shtrembër’.
“Ne presim që kjo lloj drejtësie të bjerë disa gjëra. Ca ‘drunj të shtrembër’ të shkojnë të paguajnë një çmim për këtë që po ndodh sot. Kjo është e gjitha. Përsa kohë që nuk ka rezultate, niveli i sulmeve, i goditjes, i kritikës do jetë i lartë. Dhe në këtë mes do ketë edhe ekzagjerime, edhe fjalë të padrejta që jo të gjithë i meritojnë”, nënvizoi ai.
