Në mediat sportive italiane, faqet e para pushtohen nga ajo që ndodhi dje në Kupën e Botës mes Gjermanisë dhe Japonisë, jo vetëm në fushën e lojës, por sigurisht mbi të gjitha me imazhin tashmë ikonik të kombëtares gjermane me dorën mbi gojë.
Në mediat sportive spanjolle, sigurisht që fokusi kryesor është tek fitorja e thellë e Spanjës ndaj Kosta Rikës me rezultat 7-0.
Ndjekim disa nga titujt kryesorë të mediave sportive për ditën e sotme:
“Bota e çmendur”, titullohet La Gazzetta dello Sport me ngazëllimin e Asanos. Dhe më pas fotoja e Gjermanisë: “Gjermanët kundër FIFA-s me duart mbi gojë”.
Corriere dello Sport hapet me titullin: “Kurrë mos thuaj Banzai”, e cila fokusohet tek goditja “vdekjeprurëse” nga Japonia që mahniti Gjermaninë.
Tuttosport vendos si titull kryesor objektivat e Juventusit në merkato: “Sytë tek Singo dhe Maehle”, të cilët mund të jenë dy operacione të mundshme në janar. Hapësirë ka dhe për panzerat, duke I përshkruar me titullin kontravers: “Gjermania,gjesti dhe censura: “Nuk bëhet fjalë për të drejtat e njeriut”.
Gazeta madrilene AS hapet me titullin: “Të ëndërrojmë”. Spanja bëhet sensacioni i Kupës së Botës pasi mposhti Kosta Rikën 7-0. Versioni më i mirë i tiki-takas është kthyer.
“Një Spanjë brutale” është titulli i prestigjiozes Marca. Debutim brilant dhe ekspozitë korale e ekipit të Luis Enrique.
Në vend të këtyre, faqja e parë e L’Equipe është ikonë: “Një dashuri”, duke shpalosur në faqen e parë një përqafim plot emocion mes Mbappe dhe Griezmann.
