Athina i është përgjigjur me tone të ashpra retorikës së vazhdueshme agresive të Ankarasë. Kujtojmë se dy ditë më parë Turqia i kërkoi Greqisë që të çmilitarizojë ishujt e Egjeut.
Selia e diplomacisë greke në njoftimin e saj thekson se “deklaratat e zyrtarëve turq për çmilitarizimin e ishujve të Egjeut janë hedhur poshtë në mënyrë të përsëritur, me një sërë argumentesh, të cilat i përmbajnë edhe letrat që Greqia i ka dërguar Sekretarit të Përgjithshëm të OKB-së”.
Në të njëjtin njoftim theksohet se “vënia në pikëpyetje e sovranitetit të ishujve grekë dhe rritja e tensionit në Egje, përmes kërcënimeve për luftë, janë dënuar në tërësi nga komuniteti ndërkombëtar dhe Ministria e Jashtme.
Greqia, duke respektuar të drejtën ndërkombëtare dhe të drejtën e detit, refuzon edhe një herë në tërësi ankesat e njëanshme turke dhe i cilëson kërcënimet e përsëritura të luftës si krejtësisht të papranueshme”.
Dy ditë më parë ministri i jashtëm turk, Cavusoglu gjatë një konference të përbashkët për shtyp me homologun rumun, ndër të tjera deklaroi se “Greqia po ndërmerr hapa negativë për sigurinë tonë, pavarësisht rrethanave. Militarizon ishujt.
Ose Greqia do të tërhiqet dhe do t’u përmbahet këtyre kushteve ose ne do të bëjmë atë që duhet. Kjo është arsyeja pse presidenti ynë i nderuar thotë “mund të reagojmë papritur një natë”. Greqia duhet të kujtojë: kush mbjell erëra korr stuhi. Nëse nuk doni paqe, ne do të bëjmë gjithçka që duhet. Papritur një natë.”
