Brazili ka pësuar humbje shokuese nga Kroacia dhe është eliminuar nga Kampionati Botëror ‘Katar 2022’.
Përkundër se ishin favoriti kryesor për ta fituar këtë Kupën e Botë, Brazili u mposht pas ekzekutimit të 11-metërshave.
Koha shtesë përfundoi me rezultat 1-1 dhe shënuesi i vetëm për brazilianët ishte Neymar, i cili nuk mund t’i mbante lotët pas eliminimit.
Ylli i Paris Saint Germain mes lotësh ka thënë se nuk e di nëse do të rikthehet sërish në Kombëtare pas kësaj humbje tronditëse.
“Më duket se është e gjitha një makth, nuk mund ta besoj atë që ndodhi, kjo është një disfatë që do të rëndojë për një kohë të gjatë, është shumë e trishtueshme”, tha fillimisht Neymar.
“Në futboll, dhe jo vetëm, kjo ndodh. Dua të falënderoj popullin brazilian për dashurinë dhe mbështetjen që na kanë dhënë. Tani nuk dua të them nëse ka ndonjë fajtor”, u shpreh braziliani.
Më tej, golashënuesi më i mirë në histori të Brazilit së bashku me Pelen me nga 77 gola tha se ende nuk e di nëse do të rikthehet në Kombëtare pas kësaj humbje shokuese.
“Dua të marr pak kohë për të reflektuar, për të menduar për “Seleçaon” dhe çfarë dua për veten time. Nuk po i mbyll dyert, por as nuk mund të them që do të kthehem 100%”, deklaroi sulmuesi brazilian.
