“Të papranueshëm” e ka konsideruar zëdhënësja e NATO-s, Oana Lungescu, sulmin ndaj patrullës së EULEX në veri të Kosovës. Në një postim në Twitter, Lungescu shkruan se misioni i NATO-s në Kosovë mbete jashtëzakonisht vigjilent dhe “plotësisht i aftë për të kryer mandatin që ka”.
Po ashtu, Lungescu i bën thirrje palëve që të shmangin veprimet dhe retorikën provokuese dhe të kontribuojnë për stabilitetin.
“Ne bashkohemi me Aleatët e NATO-s dhe BE- në për të dënuar fuqishëm sulmin me granatë ndaj patrullës së EULEX-it mbrëmë. Çdo sulm i tillë është i papranueshëm dhe përgjegjësit duhet të mbajnë përgjegjësi. Misioni i NATO-s në Kosovë, KFOR-i, mbetet jashtëzakonisht vigjilent dhe plotësisht i aftë për të kryer mandatin që ka. U bëjmë thirrje të gjitha palëve që të shmangin veprimet dhe retorikën provokuese dhe të kontribuojnë për qetësinë dhe stabilitetin”, shkruan Lungescu.
Një patrullë vëzhguese e Misionit të Bashkimit Evropian për Sundimin e Ligjit në Kosovë, EULEX, u sulmua me një shok bombë (bombë çorientuese) mbrëmjen e së shtunës, në afërsi të Rudarës, në komunën e Zveçanit. Lajmi u bë me dije nga EULEX, që konfirmuan se fatmirësisht asnjë zyrtar i Njësisë Policore nuk është lënduar, teksa i konsideroi sulmet të papranueshme
