I dërguari i Bashkimit Europian për Ballkanin Perendimor, Gabriel Escobar është shprehur se Kosova ka garanci të forta sigurie nga SHBA dhe KFOR ndaj nuk do të jetë në rrezik edhe nëse Serbia e sulmon atë .
Në një intervistë për Radio Evropa e Lirë, Escobar ka deklaruar se nuk pret që Serbia të sulmojë Kosovën , por edhe nëse ndodh ajo nuk do të jetë në rrezik.
“Para së gjithash, nuk e pres këtë. Por, së dyti, do të ritheksoj se Kosova ka garanci të forta sigurie nga Shtetet e Bashkuara, të manifestuara me pjesëmarrjen e tyre në KFO”, tha ai.
I pyetur se si mund të kontribuojë SHBA-ja, ose ai personalisht, në uljen e tensioneve , Escobar u përgjigj se ai ka treguar gatishmërinë për të dëgjuar shqetësimet e tyre.
Sipas Gabriel, shqetësimi më madhor i komunitetit serbë është krijimi i Asociacionit, dhe ai deklaroi se SHBA do të punojë për asociacionin pasi është një obligim i saj.
“Unë i kam thënë komunitetit serb se jam i hapur t’i dëgjoj shqetësimet e tyre. Ata kanë disa shqetësime legjitime. Ne, po ashtu, po kërkojmë mënyra për ta ndihmuar këtë qeveri që të forcojë pozicionin e saj në shumë gjëra. Por, gjëja më e rëndësishme që SHBA-ja do, është të shohë krijimin e Asociacionit të komunave serbe. Unë u kam thënë njerëzve se Shtetet e Bashkuara do ta ndihmojnë këtë qeveri që ta zbatojë këtë. Nga pozicioni ynë, është një detyrim ndërkombëtar, ligjërisht i obligueshëm.
Është obligim për Serbinë, është obligim për Kosovën, është obligim për BE-në që ka ndihmuar në negocimin e tij. Dhe, pasi që ne e mbështesim dialogun, është edhe angazhim yni. Tani, një politikan i vetëm në një parti të vetme politike nuk mund të largohet nga ky detyrim. Pra, ne do të punojmë për Asociacionin. Ky do të jetë kontributi ynë në procesin e dialogut”, u shpreh ai.
