Kryeministri Edi Rama, në Ditën e Diasporës, shprehu dje mirënjohjen për të gjithë emigrantët që janë kthyer në atdhe për të investuar dijet e fituara bashkë me kursimet në emigracion.
Kryeministri shprehu respektin për të gjithë shqiptarët që jetojnë e punojnë jashtë, ndërsa ndau në rrjetet sociale një video të emigrantëve të rikthyer në atdhe. “Me përuljen plot respekt për të gjithë shqiptarët që jetojnë e punojnë jashtë, po edhe me mirënjohjen e admirimin për plot të tjerë që janë kthyer në atdhe për të investuar dijet e fituara bashkë me kursimet në emigracion, duke u bërë shembuj frymëzues suksesi moral e financiar për ata që janë ende jashtë, ju uroj një të diel të bukur”, u shpreh ai. Përmes videos, kryeministri solli në vëmendje shembuj suksesi të shqiptarëve që kanë lënë emigrimin për t’u kthyer në Shqipëri. Stefani Spiri muzikante, e cila ka mbaruar studimet e larta në Shtetet e Bashkuara të Amerikës ka vendosur tashmë të zhvillojë aktivitetet e saj artistike në Shqipëri. Një tjetër i ri i rikthyer nga emigrimi për të investuar në vendlindje është Bajram Nikolli. Ai ka emigruar në Itali që në moshën 15-vjeçare, ka studiuar e punuar atje dhe kursimet i investoi në Shqipëri edhe pse është me pasaportë italiane. Ferdinand Allkanjari, fermer është rikthyer në vendlindje nga viti 2005 dhe ka investuar në 4 dynym serra ku kultivon perime.
Fatmir Hysa pas 30 vitesh në emigrim u rikthye për të investuar të ardhurat e tij në një hotel në vendlindje. Ndërkohë, me rastin e Ditës Kombëtare të Diasporës, Kryetarja e Kuvendit, Lindita Nikolla, ka vlerësuar kontributin e emigrantëve shqiptarë për vendet pritëse dhe për Shqipërinë. Nikolla thekson se kapitalet financiare, sociale dhe humane të emigrantëve shqiptarë janë një burim i rëndësishëm për ekonominë dhe shoqërinë shqiptare.“Në shtetet ku janë vendosur, vëllezërit e motrat tanë emigrantë, punojnë e jetojnë me dinjitet, duke kontribuar në ekonominë, sistemin e mirëqenies, shoqërinë dhe kulturën e vendeve pritëse. Diaspora shqiptare, e hershme dhe e re, është pjesë vitale e ekonomive, shoqërive, kulturave, shkencës, jetës intelektuale e publike në vendet pritëse. Kapitalet financiare, sociale dhe humane të emigrantëve shqiptarë janë një burim i rëndësishëm për ekonominë dhe shoqërinë shqiptare”, tha ajo.
