Berisha: “Sistemi i shëndetësisë ka marrë goditjen të rëndë, u shkretua nga punonjësit”

Kryetari i PD, Sali Berisha ka zhvilluar dje një takim me anëtarët e Departamentit të Shëndetësisë. Berisha tha se sistemi i shëndetësisë ka marrë në këto vite goditje nga më të rëndat në çdo rrafsh dhe u shkretua nga punonjësit. Ai deklaroi më tej se Rama hoqi nenin, sipas të cilit në Shqipëri nuk mund të qarkullonin ilaçe të pamiratuara nga enti europian, ose enti amerikan. “Më shumë se çdo sistem tjetër, sistemi i shëndetësisë u shkretua nga punonjësit e saj të cilët këto vitet e fundit u larguan në emigracion në proporcione që riktheu treguesin mjek për banorë në vitet ’60 të shekullit të shkuar. Jo vetëm që Shqipëria nuk njohu progres në këtë tregues sh të rëndësishme, por e kundërta ndodhi, tregoi hapa mbrapa të periudhës sime studentore për shkak të një fuge masive të mjekëve dhe të infermierëve”-tha Berisha. Ai vijoi më tej se shumë mjekë dhe infermierë janë larguar. “Kolegë të mi kanë ikur. Si Gramshi është shumica. Sistemi ynë ka humbur pothuajse në tërësi atë që quhet rajonizim dhe që është i domosdoshëm për t’u përballur, për të plotësuar kërkesat, nevojat e këtij sistemi. Kudo mashtrimi, falsiteti, gënjeshtra kanë pasoja, por në shëndetësi kanë pasojat më fatale, kanë pasojë jetën. E vërteta është se në tërësi listën e ilaçeve sot e bëjnë kompanitë e prodhimit dhe pasi zhduken disa standarde të domosdoshme ligjore për Shqipërinë, ilaçet kallpe në farmacitë tona, në sistemin tonë farmaceutik janë rregull”-theksoi kreu i PD-së.