Pjesa e parë e ditës do të jetë nën dominimin e kthjellimeve në të gjithë ultësirën perëndimore, por në zonat malore pritet të ketë kalime të lehta të vranësirave. Ndërsa orët e pasdites dhe mbrëmjes do të sjellin kalime të pakta të vranësirave në të gjithë territorin, ku më të fokusuara vranësirat do jenë në zonat Verilindore dhe Juglindore.
Sipas MeteoAlb, temperaturat e ajrit do të rriten lehtë në mëngjes, por mbeten konstante në mesditë duke luhatur vlerat ditore nga 2°C deri në 17°C. Era do të fryjë mesatarisht me shpejtësi 25 km/h nga drejtimi Perëndimore Veriperëndimore duke krijuar në det dallgëzim të ulët.
Kosova
Mbeten prezente masat ajrore të qëndrueshme në Kosovë duke sjellë alternime kthjellimesh dhe vranësirash në të gjithë territorin. Pritet që kthjellimet më të dukshme të jenë në zonat Perëndimore dhe gjatë pjesës së parë të ditës. Ndërsa orët vijuese do të sjellin kalime vranësirash në të gjithë vendin.
Maqedonia e Veriut
Territori i MV në orët e para të ditës do të jetë në mbizotërimin e orëve të shumta me diell në të gjithë vendin. Ndërsa në pjesën e dytë të ditës do të ketë kalime të pakta të vranësirave në të gjithë MV, por nuk do të mund të sjellin reshje.
Rajoni dhe Evropa
Vijojnë kushtet e qëndrueshme atmosferike të jenë dominuese në Europën Jugore duke sjellë alternime kthjellimesh dhe vranësirash. Ndërsa qendra e kontinentit do të jetë pjesërisht me vranësira të shpeshat, të cilat do të gjenerojnë reshje shiu. Por Europa Lindore dhe gadishulli Skandinav do të jenë nën prezencën e vranësirave të shumta dhe reshjeve të dëborës.
