Kryebashkiaku i Klosit, Ilmi Hoxha thotë se nga tërmeti i mbrëmjes së djeshme me magnitudë 4.7 rihter dhe 5.2 ballë, janë dëmtuar lehtë 22 shtëpi. Klosi ka qenë pikërisht dhe epiqendra e lëkundjeve, të cilat u ndjenë të forta dhe në Tiranë e qytetet e tjera.
“Momentalisht bëhet fjalë për 22 banesa që kanë pësuar dëmtime të lehta nga tërmeti i mbrëmshëm. Nga Bashkia Klos janë ngritur grupet e punës dhe po bëhen verifikimet e banesave. Në momentet e para banorët kanë dalë në oborre por më pas është normalizuar situata.
Unë vet me grupet e punës kam dal në terren, duke kontrolluar për pasoja. Situata paraqitet e mirë, mund të ketë edhe problematika në ndonjë rast sporadik. Stafi mjekësor do bëjë punën e vet në lidhje me gjendjes pranë në këto situata. 2-3 persona kanë pasur çrregullime me tensionin për një periudhë të shkurtër.
Situata u normalizua që mbrëmë. Kemi shkuar në çdo banesë dhe i jemi gjetur pranë çdo familjar që ka pasur nevojë. Ka nisur puna sot për ngritjen e komisioneve për verifikimin të çdo kërkese, ankese të bërë nga qytetarët tanë”, u shpreh kryebashkiaku Ilmi Hoxha.
