Tre persona janë shpallur në kërkim dhe dy të tjerë janë vënë nën hetim në Fushë Krujë, të akuzuar si të përfshirë në dhunimin e gazetarëve të një emisioni investigativ.
Në një njoftim për mediat, Policia bën me dije se gazetarët kanë qenë duke filmuar gërryerjen e basenit të lumit Zezë nga disa persona, të cilët merrnin në kundërshtim me ligjin, inerte nga ky lum në fshatin Verjon, kur janë kërcënuar me armë zjarri. Për pasojë janë shpallur në kërkim personat me inicialet E. K., G. K., 30 vjeç dhe H. V., 30 vjeç, ndërsa kanë nisur hetimet për A. L dhe E. Gj.
Ata akuzohen për veprat penale “Shpërdorimi i tokës” dhe “Kanosja për shkak të detyrës”, ndërsa materialet për këtë rast i kaluan Prokurorisë, për veprime të mëtejshme.
Në lidhje me ngjarjen reagoi edhe President, Bajram Begaj, i cili dënon dhunën e ushtruar ndaj punonjësve të medias në krye të detyrës. Kreu i shtetit kërkoi ndjekjen me përgjegjshmëri të rastit nga organet ligjzbatuese.
