Ish-kryeministri Sali Berisha ka komentuar deklaratën e tij të bujshme sot në Kuvend se disponon video erotike të ish-zyrtarit të FBI-së Charles McGonigal me zyrtare të qeverisë.
Teksa fliste për skandalin “McGonigal”, Berisha nuk ka lënë pa përmendur edhe Agron Nezën.
Ndërkohë ky i fundit ka reaguar me një mesazh në telefon të drejtueses së emisionit Grida Duma ku ka mohuar akuzat e ngritura nga Berisha.
“Përshëndetje Grida, unë jam Agron Neza, dhe po ndjek emisionin tuaj. Dua të them se më vjen keq që po i dëgjoj nga doktorri këto fjalë, sepse si doktorri edhe unë jemi tropojanë. Në qoftë se Edi Rama do të më kishte dhënë para do të isha në burg dhe jo në Shqipëri. Azem Hajdari ka bërë gabimin më të madh që të futi në politikë”, shkruante mesazhi me emrin e Nezës.
Të ftuarit në studio, kanë vënë në dyshim autencitetin e mesazhit, duke u shprehur se duhet verifikuar nëse është apo jo vërtet shqiptaro amerikani mik i McGonigal, Neza, por Duma ka insistuar se mesazhi i përket numrit të tij, dhe kjo nuk është hera e parë që i dërgon mesazh.
