Një kamerë e vendosur në një prej makinave që po qarkullonin gjatë momentit kur ndodhi aksidenti zinxhir këtë mesditë në Tiranë ka filmuar gjithë ngjarjen.
Një makinë ka dalë para urbanit të linjës së Unazës, që më pas humbet kontrollin dhe përplas mjetet e tjera që janë të ndaluara në semafor.
Autobusi, i cili po lëvizte nga ura e ish-hotel Dajtit drejt Urës së Shallvareve lëviz mes trafikut pa ndaluar në stacion duke goditur fillimisht një automjet në të majtë dhe më pas merr një mjet tjetër para duke vijuar më pas me përplasje në rresht.
Nga ky aksident, 9 persona mbetën të lënduar ku 3 prej tyre udhëtonin me mjetin urban.
Fatmirësisht, nga kjo përplasje e fuqishme shpëtuan pa lëndime personat që ndodheshin në stacion duke pritur urbanin.
Zyrtarisht, policia nuk ka mundur të identifikojë përgjegjësin për këtë aksident, por dyshimet janë se shkak është shpejtësia.
Një prej drejtuesve të mjetit, i cili u përfshi në aksident tregoi se shpejtësia e mjetit urban ishte tej normave të lejuara.
Drejtuesi i autobusit, 62-vjeçari Agron Xhafa, i cili është një prej të lënduarve në aksident, pas analizave rezultoi se nuk kishte përdorur alkool por tha se vuante nga disa sëmundje dhe në momentin e aksidentit nuk është ndierë mirë.
Grupi hetimor, i ngritur për rastin po koordinon provat e mara në vendngjarje dhe dëshmitë e protagonistëve për të nxjerrë shkakun zyrtar të aksidentit.
