Komisioni Shtetëror Zgjedhor do të vendosë sot për regjistrimin ose jo të PD-së në zgjedhje. Shpresa është më e madhe nga “Grupimi Basha-Alibeaj”, ndërsa “Rithemelimi” i përfaqësuar nga Sali Berisha është thuajse e painteresuar pasi po përqëndrohet në koalicionin me Metën.
Partia Demokratike do e gjejë “paqen” sot në Komisonin Qendror Zgjedhor edhe pse lufta e saj do të vijojë të bëhet edhe jashtë institucionit mes dy “kokave”. Pas përplasjes mes Bashës dhe Aliebajt, por edhe Berishës, Celibashi do i vendos vulën sot sa i takon përfshirjen e PD-së si subjekt zgjedhor në vendoret e 14 majit. Ndërkohë, përfaqësuesi ligjor i Partisë Demokratike në KQZ, në një deklaratë për mediat i ka bërë thirrje kryekomisionerit që të dalë me një vendim përfundimtar për regjistrimin e PD-së në këto zgjedhje. Indrit Sefa, duke iu referuar edhe vendimit të marrë dje nga KAS, solli në vëmendje se që prej orës 10.00 të datës 11 mars, komisioneri Celibashi është në shkelje të afateve për të marrë një vendim të tillë dhe për rrjedhojë, shtoi ai, po shpërdoron detyrën. “Po cënon PD dhe po shkel afatet proceduriale të parashikuar në Kodin Zgjedhor.
Të ndalohen shkeljet e këtyre dispozitave, të marrë në shqyrtim çështjen e PD në kohë sa më të shkurtër. Komisioneri ka mbajtur qëndrime politike, jashtë procedurës ligjore dhe nuk është në funksionin e tij si institucion i pavarur për të garantuar zgjedhjet. Komisioneri ka disa orë që e ka në tavolinë vendimin e KAS,” deklaroi Sefa. I pyetur se cili do të jetë reagimi i grupimit të Alibeajt nëse Celibashi i qëndron kërkesës për firmën e Bashës, Sefa theksoi se dokumentacioni i dorëzuar prej tyre është i plotë dhe se do të ndiqen të gjitha hapat ligjorë për regjistrimin e PD-së si subjekt zgjedhor.
Reagimi i Bardhit
Deputeti demokrat Gazment Bardhi ka akuzuar kryekomisionerin Ilirjan Celibashi se po pengon politikisht regjistrim e Partisë Demokratike si subjekt zgjedhore për vendoret e 14 majit. Në një reagim në Tëitter pas vendimit të KAS lidhur me kërkesën ankimore të bërë nga grupimi në të cilin Bardhi bën pjesë, deputeti demokrat i bën thirrje Celibashit që të shprehet menjëherë për kërkesën e bërë nga PD. “Komisioneri Shtetëror i Zgjedhjeve ka detyrimin ligjor të shprehet menjeherë për kërkesën e PD për regjistrim. Zvarritja që ai po bën, është e paligjshme, është e papranueshme. Ai kishte detyrimin të merrte vendimin të shtunën në orën 10:00. Edhe KAS-i konstaton se vendimi i tij ka rënë nga fuqia në orën 10 të datës 11.03.2023. Pse po fshihet Ilirjan Celibashi? Cili është interesi i tij politik për zvarritjen e vendimmarrjes? Përgjigja është vetëm një: Ilirjan Celibashi po pengon politikisht regjistrimin e PD!”, shkruan Bardhi. Kujtojmë se në seancën paraprake, Komisioni i Ankimimeve dhe Sanksioneve vendosi të mos pranojë ankimimet e grupimit Alibeaj dhe “Rithemelimit” për regjistrimin e Partisë Demokratike në Zgjedhjet e 14 majit”. Ndërkohë Berisha kërkon zhbërjen e vendimit të Celibashit, i cili vendosi që ish-kryeministri të mos regjistrohet në zgjedhje me siglën e Partisë Demokratike. Sipas tij, KQZ nuk mund të refuzojë regjistrimin e PD përfaqësuar nga Sali Berisha vetëm bazuar mbi mungesën e shkresës së regjistrit të partive politike, pasi sipas tij në regjistrin e partive politike vijon të mbeten të dhëna të pasakta dhe të vjetëruara.
