Më shumë se 100 zjarre, shumica prej tyre si pasojë e zjarrvënieve, sipas autoriteteve, janë ndezur në veri të Spanjës, ndërsa një tjetër, që për një javë dogji zona të mëdha pranë Valencias, në lindje, u vu nën kontroll.
Gjithsej 119 zjarre janë ndezur pasditen e sotme në Asturias dhe Cantabria fqinje. Në një moment më parë, 160 zjarre shpërthyen njëkohësisht në këto dy krahina malore të famshme për pyjet e tyre, thanë autoritetet, duke siguruar se shumica ishin vepër e zjarrvënësve.
“Ne po përballemi me terroristë të vërtetë që po rrezikojnë jetë, fshatra dhe qytete”, shkroi në Twitter presidenti i Asturias, Adrian Barbón. “Ata që veprojnë në këtë mënyrë nuk meritojnë të quhen ndryshe”, u shpjegoi më pas gazetarëve, duke iu referuar karakterizimit që ia atribuoi zjarrvënësve.
Zjarret u rritën në përmasa për shkak të erërave të forta dhe për pasojë shumë rrugë u mbyllën dhe qindra njerëz u detyruan të evakuoheshin nga shtëpitë e tyre. Qyteti bregdetar Valdes është përfshirë nga flakët dhe është shkëputur nga pjesa tjetër e vendit, ndërsa në Oviedo flakët kanë mbërritur në shtëpitë për shkak të zjarrit në malin Naranco.
Kryeministri spanjoll Pedro Sanchez, i cili po viziton Kinën, tha se foli me Barbon dhe shprehu solidaritetin e tij.
Në Castellón, në rajonin e Valencias, zjarrfikësit arritën sot të vënë nën kontroll një zjarr në pyll që shpërtheu më 23 mars. Ky është zjarri i parë i madh pyjor këtë vit dhe vlerësohet të ketë djegur gjithsej 47,000 hektarë.
Spanja po vuan nga një thatësirë afatgjatë dhe autoritetet besojnë se sezoni i zjarreve, i cili deri më tani ishte i kufizuar në verë, do të shtrihet në pranverë dhe vjeshtë si rezultat i ndryshimeve klimatike. Në vitin 2022, një “vit i zi” për Evropën, Spanja ishte vendi më i goditur pasi pothuajse 500 zjarre dogjën 3 milion hektarë, sipas Sistemit Evropian të Informacionit për Zjarret në Pyje (Effis).
