Nuk u grumbullua me skuadrën pasi refuzoi të ndërpriste agjërimin e Ramazanit në ditën e ndeshjes. I ndodhi mbrojtësit algjerian të Nantës, Jaouen Hadjam, praktikant mysliman i cili u përjashtua nga trajneri i tij për sfidën që më pas e humbi kundër Reims të dielën në Ligue 1. Hadjam që kishte shkuar te Nantes nga Paris ishte aktivizuar 9 herë nga trajneri Koumbare që në lidhje me këtë çështje u shpreh:
“Nuk ka asnjë mosmarrëveshtje me Jaouen në lidhje me këtë. I mbështes ata që vendosin të agjërojnë, por në ditën e ndeshjes nuk duhet ta bëjnë. Ndaj është shumë e thjeshtë, nëse nuk ha në ditën e ndeshjes, nuk luan. Nuk është një dënim, rregullat i vendos unë. Kjo është një zgjedhje e tij dhe e respektoj”.
Ndërkohë, vetë 20-vjeçari i ka komunikuar klubit se mund të ndërpresë agjerimin vetëm për ndeshjet në transfertë. Diçka kjo që për ata që njohin rregullat e agjerimit të myslimanëve është e kuptueshme, pasi nga ky obligim përjashtohen ai që udhëton dhe i sëmuri. Në ditët e kaluara ishte hapur ndërkohë një polemikë pikërisht në Francë në lidhje me Ramazan, për sa i përket ndërprerjes për pak minuta të ndeshjeve në perëndim, sa për t’ju lejuar futbollistëve myslimanë që të shuajnë etjen apo të hanë një frut para se të rikthehen në fushë.
Franca këtë herë shkon kundër tendencës europiane, pasi në Premier League dhe në Serinë A italiane është lejuar ndalimi i ndeshjeve për iftar, siç u pa edhe gjatë në Angli këtë të hënë Everton – Tottenham apo në San Siro të shtunën gjatë Inter- Fiorentina. Edhe diçka interesante, shumë janë surprizuar për oraret e nisjes aspak të zakonshme të ndeshjeve kualifikuese të Kupës së Afrikës 2023 apo ato të javës së fundit të fazës së grupeve në Champion s për CAF.
Për shembull Wydad Casablanca – js Kabylie të dielën e kaluar nisi në orën 22.00. Natyrisht diçka e tillë është bërë që të pritet perëndimi për t’ju dhënë kohë lojtarëve të shuajnë etjen dhe urinë para se të luajnë. Quhet respekt, apo tolerancë, nuk është kaq e vështirë. Diçka që i duhet shpjeguar dhe trajnerit të Nantes.
