I dërguari i posacëm i Departamentit Amerikan të Shtetit për Ballkanin Perëndimor, Gabriel Eskobar, ka nisur axhendën e takimeve në Tiranë.
Rreth orës 16:00 Escobar është parë të hyjë në ambjentet e kryeministrisë, ku ka takuar kreun e qeverisë Edi Rama. Rreth 20 minuta ka zgjatur takimi i kryeministrit Edi Rama me Gabriel Escobar, të dërguarin e SHBA-ve për Ballkanin Perëndimor. Mësohet se tematikë e diskutimit kanë qenë zgjedhjet vendore të cilat do të mbahen në 14 maj.
Më pas i dërguari i posacëm i Departamentit Amerikan të Shtetit për Ballkanin Perëndimor do i drejtohet Presidencës, ku në orën 17:00 do të pritet në zyrë nga presidenti Bajram Begaj.
Nesër zyrtari i lartë amerikan do të takojë PD-në zyrtare, përkatësisht Enkelejd Alibeajn,Gazmend Bardhin dhe Jorida Tabakun.
Pjesë e axhendës së Eskobar është bërë edhe Ilir Meta, edhe pse herën e fundit kur diplomati erdhi në Tiranë, nuk e takoi Metën që mbante postin e Presidentit.
Nuk do të ketë një takim me Sali Berishën, dhe me asnjë deptutet demokrat që e mbështet atë. Vizita vjen 2 ditë përpara çeljes zyrtare të fushatës, dhe pak pasi Yuri Kim e ka quajtur Berishën një zjarrvënës që nuk meriton të votohet nga shqiptarët.
