Kryebashkiaku Erion Veliaj, teksa ka vlerësuar me certifikatë figurat e spikatura të partisë socialiste të njësisë nr. 10, ka ironizuar kandidatët e opozitës për zgjedhjet e 14 majit.
Erion Veliaj: Partia Socialiste ka fituar 8 nga 9 betejat e fundit, një rekord që nuk e ka asnjë parti tjetër në rajonin tonë apo në Europë. E keni vënë re, në këtë fushatë, pothuajse të gjithë kandidatët janë të majtë? Kemi kandidatë nga Partia Socialiste, kemi një nga Partia Komuniste, kemi një nga një lëvizje marksiste, kemi një që hiqet sikur është me Saliun, por është regjistruar me LSI. Pra, këtu të gjithë kandidatët, formalisht janë të majtë. Kjo është një ditë e mirë për të majtën, kur edhe kundërshtarët tanë më të paepur regjistrohen si të majtë. E kishit menduar se një ditë, edhe Flamur Noka do regjistrohej si anëtar i Partisë Komuniste vetëm për të futur një kandidat në Tiranë?!
Sipas Veliajt, e gjithë klasa politike është fokusuar majtas për të marrë disa vota.
“Ata e dinë që nuk fitojnë, megjithatë shansi për të marrë disa vota është duke folur majtas, duke menduar majtas, duke bërë fushatë majtas, duke u investuar në ide të majta. Kjo është një gjë e mirë për vendin tonë, se pothuajse e gjithë klasa politike është e orientuar në një diskutim majtas. Sot ti ke edhe të drejtën të marrësh të gjithë idetë e majta, madje të shkosh edhe më larg se Enveri dhe të thuash “do ta bëjmë çdo gjë falas”. Tortën falas, taksitë falas, avionët falas”.
Për Veliajn, PS është e vetmja forcë politike ku në statutin e partisë ka vlerësimin publik për të gjithë ata që kanë dhënë një kontribut për fitore. Një traditë që sipas Veliajt do të vazhdojë në të gjitha njësitë.
