Policia britanike ka arrestuar ditën e sotme 3 persona për vrasjen e biznesmenit Ardian Nikulaj në Shëngjin.
Bëhet fjalë për shtetasit me iniciale E. H., Th. M. dhe S. H. , të cilët ishin shpallur në kërkim nga autoritetet shqiptare.
Aktualisht po vijon puna edhe për kapjen e 3 personave të tjerë të shpallur në kërkim.
Në vijim të veprimeve të thelluara hetimore dhe kërkimore, për lokalizimin dhe kapjen e personave të shpallur në kërkim për vrasjen e 51-vjeçarit Ardian Nikulaj, falë shkëmbimit të informacionit në kohë, Policia britanike mundi të lokalizojë në Londër, të kapë dhe të vërë në pranga, me qëllim ekstradimin drejt Shqipërisë, 3 prej shtetasve të shpallur në kërkim, konkretisht shtetasit E. H., Th. M. dhe S. H.
Ndërkohë, Policia e Shtetit vijon intensivisht punën, në bashkëpunim të ngushtë me partnerët për lokalizimin dhe kapjen e personave të tjerë të shpallur në kërkim në lidhje me ngjarjen”, thuhet në njoftimin e policisë.
