Në Napoli të gjithë ishin përgatitur për festën e titullit të tretë në histori, plot 33 vite pas të dytit, megjithatë tifozët do të duhet të presin edhe disa orë, që të hapin zyrtarisht shampanjën.
Ndonëse kërkuan me ngulm që ndeshjen me Salernitanën ta luanin pas asaj mes Interit dhe Lazios, të besuarit e Spallettit nuk shfrytëzuan dot asistin e zikaltërve, pasi nuk shkuan dot përtej barazimit 1-1, duke lënë të hapur garën për titullin, ndonëse vetëm matematikisht.
Mbrojtësi Oliveira kaloi në avantazh skuadrën e Spallettit në minutën e 62-të, por kur të gjithë po përgatiteshin për festë, ishte Dia që shënoi golin e barazimit për Salernitanën, duke e shtyrë atë të paktën deri në ndeshjen e radhës.
Napoli kryeson kampionatin me 79 pikë, 18 më shumë se Lazio e vendit të dytë dhe zyrtarisht ka nevojë vetëm për një pikë, që të shpallet kampione e Italisë për herë të tretë në histori, pas sezoneve 1986-1987 dhe 1989-1990.
