Kampionatet respektive të Europës po arrijnë në fazën përfundimtare dhe beteja për triumfin dhe arritjen e objektivave sezonal po bëhet akoma dhe më e nxehtë.
Më poshtë do të ndjekim disa nga titujt kryesorë të mediave sportive.
Në Spanjë titulli kampion është pothuajse i likuiduar me Barcelonën që arriti të fitonte përsëri me rezultatin minimal 1-0 duke u afruar gjithnjë e më pranë titullit kampion.
Gazeta ‘Sport’ hapet me titullin: “Pothuajse kampion”
Gazeta katalanase ‘Mundo Deportivo’ shkruan: “Goli i kampionatit”, me golin e mbrojtësit Jordi Alba që i dhuroi fitoren e rëndësishme ekipit blaugranas.
E përditshmja spanjolle ‘Marca’ zhvendos fokusin në basketboll dhe hapet me titullin: “Ka ende një luftë”, duke iu referuar suksesit të skuadrës së basketbollit të Real Madridit që triumfoi me rezultatin 82-80 përballë Partizanit të Beogradit.
Në Itali, paraqitjet e Lautaro Martinez kanë tërhequr vëmendjen e shumë klubeve të mëdha evropiane, megjithatë Inter duket i bindur për qëndrimin e tij.
“La Gazzetta dello Sport” hapet me titullin: “Lautaro qëndron këtu”, me argjentinasin që duket se ka refuzuar ofertat nga klubet angleze të gatshme për të firmosur me bomberin.
Në Angli ka ende shpresë te topçinjtë e Arsenal të cilët fituan bindshëm kundër Chelsea-t mbrëmjen e djeshme me rezultatin 3-1.
“Do të luftojmë deri në fund” shkruan britanikja “Daily Express Sport”.
E gjithë vëmendja e Parisit është tek Lionel Messi. Pas udhëtimit dy ditor të argjentinasit në Arabinë Saudite pa miratimin e klubit, PSG ka vendosur të dënojë Messin me dy javë pezullim.
“L’Equipe” hapet me titullin: “Këputja”
