Kryetarja e Partisë Liberale Demokratike dhe njëherë deputete e Kuvendit në Maqedoninë e Veriut, Monika Zajkova kërkon ndalimin e rrjetit social “Tik-Tok” dhe rrjeteve tjera që sipas saj, nxisin dhunë.
“Në vend që të rrimë të tronditur dhe në heshtje të pikëlluar dhe të komentojmë në rrjetet sociale, me kohë të reagojmë dhe veprojmë me masa dhe veprime konkrete parandaluese”, theksoi Zajkova në Kongresin e 16-të të Rinisë Liberal Demokratike.
Monika Zajkova është shprehur se Partia Liberal Demokratike ka një sërë propozimesh që do t’i paraqesë në Qeveri. Maqedonia e Veriut i bashkohet shqetësimit të një numri në rritje vendesh që kanë nisur kërkojnë ndalimin e rrjetit social kinez.
“Është veçanërisht e nevojshme të ndalohet “Tik-Tok” si dhe rrjetet e tjera sociale që nxisin dhunën, sepse në vendin tonë kemi qenë dëshmitarë të viktimave nga përdorimi i këtyre rrjeteve”, është shprehur kryetarja e Partisë Liberale Demokratike Monika Zajkova.
Shumë vende, përfshirë Shtetet e Bashkuara dhe Kanadaja, e kanë ndaluar përdorimin e këtij aplikacioni në pajisjet qeveritare, për shkak të dilemave se TikTok-u mund të ndajë të dhënat e përdoruesve me Qeverinë kineze.
