Dy ditë më parë, Gjykata e Vlorës caktoi masën e sigurisë “arrest me burg” për Fredi Belerin, i cili akuzohet se tentoi të blinte vota në këmbim të parave dhe çështjen ia kaloi SPAK-ut.
Ndonëse ndodhet në qeli, Fredi Beleri, doli fitues në zgjedhjet vendore për Himarën. Por për avokatin Spartak Ngjela, kandidati i opozitës nuk ka shpëtim nga burgu.
Ngjela tha në një dalje për mediat se Fredi Beleri është i djegur, ndërsa parashikoi se SPAK do të vihet në lëvizje shumë shpejt e nuk do ta zgjasë këtë çështje.
“Ky është kapur në flagrancë, nuk ka gjyqtar ta shpëtojë. E di unë, është kapur dhe është i djegur. Tani ky e ka shpresën të vazhdojë 2-3 vite gjyqet siç ndodh në Shqipëri, por SPAK do të vihet në lëvizje shumë shpejt. Rama nuk i mori vetë të gjitha pushtetet, ia dha populli”, theksoi ai.
