Krerët e shteteve dhe qeverive të G7 në Hiroshima të Japonisë, vizituan Muzeun Përkujtimor të Paqes në përkujtim të bombardimit atomik të pësuar nga qyteti japonez në fund të Luftës së Dytë Botërore.
Sipas një deklarate për shtyp nga Ministria e Jashtme japoneze, vizita shërbeu për të thelluar realitetin tragjik të bombardimeve atomik, shkruajnë mediat e huaja. Pas vizitës, e ndjekur nga nënshkrimi i përbashkët i Librit të Nderit të muzeut, drejtuesit e G7 vendosën kurora me lule në Cenotafin e viktimave të bombës atomike që shkatërroi Hiroshimën më 6 gusht 1945 dhe mbollën pemë qershie.
Takimi i këtij viti do të mbahet nga data 19 deri më 21 maj në Hiroshimë të Japonisë, që në vitin 1945 ishte qyteti i parë që u bombardua me armë bërthamore. Këtë vit, në mesin e të ftuarve janë udhëheqësit e Australisë, Brazilit, Ishujve Kuk për Forumin e Paqësorit, Indisë, Indonezisë, Koresë së Jugut e Vietnamit. G7-ta dhe shtetet e tjera perëndimore po përpiqen t’i forcojnë aleancat, të arrijnë te Jugu Global dhe ta mbrojnë ndikimin e tyre në tkurrje, pasi Kina dhe Rusia po përpiqen të depërtojnë ekonomikisht dhe të nxisin alternativa ndaj rendit ndërkombëtar ekzistues.
