Shërbimet sekrete po hetojnë një ngjarje të çuditshme, ku shoferi i një kamioni që kishte një flamur nazist brenda, theu barrierat mbrojtëse të Shtëpisë së Bardhë.
“Doja të rrëmbeja dhe dëmtoja Presidentin Biden”. Kështu është shprehur shoferi i kamionit që u përplas me barrierat e sigurisë në sheshin Lafayette, pranë Shtëpisë së Bardhë mbrëmjen e së hënës. Shoferi, identiteti i të cilit ende nuk dihet, u arrestua me akuza të ndryshme, përfshirë sulmin dhe kërcënimin ndaj autoriteteve, raporton TGCOM24.
Sipas një hetimi fillestar, nuk ka të lënduar. “Hetimi paraprak zbulon se shoferi i kamionit mund të jetë përplasur qëllimisht me barrierat e sigurisë”, shkroi në Twitter Anthony Guglielmi, shefi i komunikimeve të inteligjencës.
Dëshmitë e të pranishmëve raportojnë se automjeti i kompanisë me qira U-Haul u përplas me barrierat e sheshit Lafayette. Pas përplasjes së parë, drejtuesi ka rindezur mjetin dhe ka goditur sërish portën. Me të mbërritur në vendngjarje, agjentët siguruan zonën përpara se të kontrollonin mjetin, ku brenda saj u gjet edhe një flamur nazist.
