Qeveria shqiptare ka dhënë dritën jeshile për ndërtimin e një ujësjellësi që do të lidhë Gjirokastrën me Puglian. Ishte Presidenti i rajonit, Michele Emiliano, i cili dha lajmin në një konferencë për shtyp ku foli për investimet në sistemin e ujësjellësave.
“Qeveria shqiptare na ka autorizuar të fillojmë planifikimin e ujësjellësit që do të lidhë Shqipërinë me Italinë. Shqipëria hedh një sasi të konsiderueshme uji në det dhe padyshim ka interes të paguhet për ujin. Ne kemi interes ta marrim atë sepse për ne kjo do të thotë t’i japim një model të ri bujqësisë, të zhvillojmë turizmin dhe t’u japim një të ardhme të gjithë qytetarëve të Puglias.”
Sipas asaj që shkruajnë mediat italiane, për të ndërtuar ujësjellësin do të duheshin miliardë Euro investime dhe punimet parashikohen të përfundojnë për një periudhë 4-vjeçare.
Qëllimi është që çdo vit të transportohen 150 milionë metër kub ujë në Pulia në një thellësi maksimale nënujore prej 850 metrash.
Italia do të përfitonte nga ky projekt pas krizës së thatësirës që ka prekur rajonin vitet e fundit. Megjithatë, edhe Shqipëria do të përfitonte nga vendet e punës që do të krijohen, të cilat mendohet të jenë rreth 8,000.
