Tenisti spanjoll, Carlos Alcaraz, foli për mediat në prag të ndeshjes ndaj serbit Novak Djokovic në turneun francez të Roland Garros. Numri 1 i botës deklaroi se ndeshja përballë serbit do të jetë shumë e vështirë :
“Për mendimin tim, favoriti kryesor është Novak Djokovic. Është nder për mua të përballem ndaj tij. Shihja çdo ditë ndeshjet e tij në televizor, në kohën që përballej me Rafa Nadal. Gjithmonë e kam pasur ëndërr ta rivalizoj.”
Më tej spanjolli foli për mediat edhe për ecurinë e tij gjatë këtij turneu:
“Tani ndihem si një nga më të mirët në bote. Kam shumë besim. Dua të bëj gjithçka të duket e thjeshtë dhe të inspiroj njerëz me lojën time.”
Carlos Alcaraz dhe Novak Djokovic do të përballen pasditen e së premtes në gjysmëfinalen e turneut të 123-të të Roland Garros.
