Gjykata e Posaçme e GJKKO ka dënuar me dy vite shërbim prove ish-gjyqtaren e Elbasanit Zamira Vyshka.
Vyshka akuzohet për korrupsion dhe për këtë Gjykata , veç dënimit me 2 vite shërbim prove ka vendosur t’i heqë ish gjyqtares dhe të drejtën për të ushtruar funksione publike për tre vite.
Vyshka u arrestua më 22 korrik 2022, me avokatin mbrojtës Ilir Pashaj dhe Taulant Ramollari, Xhulio Musa e Andrea Tirana.
Fakti penal i hetuar, lidhet me një rast të korrupsionit aktiv/pasiv në sistemin e drejtësisë (në qytetin e Elbasanit), ku persona të interesuar/familjarë të një shtetasi të arrestuar në bashkëpunim me avokatin mbrojtës, i kanë ofruar gjyqtarit të çështjes një shumë monetare me qëllim favorizimin në caktimin e masës së dënimit.
Bëhet fjalë për një pagesë prej 4 milionë lekësh të vjetra, që këta shtetas po e diskutonin mes tyre, dhe do t’ja jepnin gjyqtares së çështjes, zonjës Zamira Vyshka. Zamira Vyshka, u akuzua për kryerjen e veprës penale të “Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë”.
