Kryeministri Edi Rama në konferencën e përbashkët me homologun maqedonas, Dimitar Kovaçevski është ndalur tek refuzimi i takimit të Albin Kurtit me të.
Rama tha se edhe hasmi kur të vjen në shtëpi i hapet dera, duke kërkuar që Kurti të ndryshojë mendje.
“Edhe hasmi kur të vjen në shtepi i hapet dera. Shpresoj që Albini të mos e shkelë këtë rregull të kanunit”, tha Rama.
Kujtojmë që kryeministri Edi Rama pritet të niset drejt Prishtinës për t’u takuar në orën 16:00 me presidenten Vjosa Osmani dhe më pas me kryetarin e Kuvendit.
Më herët, kreu i qeverisë tha se pret një konfirmim nga ana e kryeministrit Albin Kurti për t’u takuar pasdite në kuadër të këtij turi rajonal.
