Të vetmit zë që ka mbetur nga opozita në këto ditë zhurritëse korriku janë ish kryeministri Sali Berisha dhe Sekretari i Përgjithshëm në Partinë Demokratke Gazmend Bardhi.
Edhe pse stafetën për inceneratorëve e mori Monika Kryemadhi, duket se me kërkesën për arrestimin e Arben Ahmetaj është tërhequr ajo dhe kreu i Partisë së Lirisë, Ilir Meta. I vetmi që po flet nga koalicioni është ish kreu i Partisë Demokratike, Sali Berisha. Edhe dje ky i fundit Sali ka dalë mesditën e së premtes në një deklaratë me gazetarët, ndërsa ka folur edhe njëherë për çështjen e inceneratorëve.
Berisha ka akuzuar kryeministri Rama si pronari i vërtetë i ndërmarrjes së aferës së djegësave, sikurse e cilësoi ai, ndërsa shtoi më tej se, Mirel Mërtiri dhe Klodian Zoto kanë qenë thjesht të punësuar privatë në këtë ndërmarrje.
“Çështja e djegësave është çështja që është trajtuar më shumë nga mediat, politika dhe e vërteta, edhe nga drejtësia këto vitet e fundit. Por konstatoj se ka një defekt në themel, ka një devijim në themel të trajtimit të këtij problemi. Së pari, duhet të shtrojmë një pyetje: pse qeveria shqiptare me djegësat është provuar organizatë kriminale? Qeveria shqiptare është provuar organizatë kriminale, sepse në këtë aferë kanë firmat e tyre antiligjore kryeministri, Sekretari i Përgjithshëm, ministrat, drejtorët dhe punonjësit më poshtë.
Në këtë kontekst, siç është e qartë dhe evidente, tashmë e konfirmuar edhe nga drejtësia, se kemi të bëjmë me një aferë të mirëfilltë korruptive, këtu janë firmat e qeveritarëve më të lartë, me në krye Edi Ramën”, është shprehur Berisha nga selia e Partisë Demokratike. Ai tha se fajin nuk e ka Mërtiri dhe Zoto por ata që ia kanë dhënë mundësinë.
“Ka edhe diçka edhe më të madhe dhe unë jam këtu për të dytën. Mediat, politikanët, analistët, për fat të keq edhe drejtësia, flasin për aferën e djegësave si një sipërmarrje e Mërtirit, Zotot dhe së fundmi, Gugalles.
Sa është e vërtetë kjo? Nuk ka asgjë më larg të vërtetës se sa kjo. Çfarë janë Mërtiri, Zoto dhe Gugallja?
Janë tre socialistë të thekur, biznesmenë ose jo, të hurit ose të litarit, ose jo, të cilët në këtë proces, arrijnë: Të futen në garë të qeverisë duke pasur zero eksperiencë në fushën e mbetjeve.
Cili biznesmen do i lejonte vetes një vendim të tillë, me zero eksperiencë në fushën e mbetjeve?
Asnjë. Së dyti, pasi nisën procesin me tenderin e Elbasanit, Edi Rama lëshon një vendim për shpalljen e emergjencës kombëtare të plehrave. A mund të besoni ju se Mërtiri dhe Zoto, kishin fuqi të bindnin Edi Ramën të shpallte emergjencën?”, ka renditur Berisha. Ai tha se dy qëllime ishin: “së pari shkelmimi i strategjisë së trajtimit të plehrave në landfille dhe seleksiono, të financuar nga BE.
Së dyti, shpallja e emergjencës pasi fondet duhet të merreshin nga fondet e emergjencës. Mendoni ju se Mërtiri dhe Zoto mund të ishin kaq të magjishëm? Apo që qeveritarët ishin kaq budallenj?”.
Ai tha se kjo dëshmon se ndërmarrja është qeveritare, ishte e Edi Ramës. “Mireli dhe Klodiani ishin të punësuar privatë në ndërmarrje. Shkojmë pak më tutje, Mireli dhe Klodiani, dy personazhe, tani jo vetëm që duhet t’i merrnin këto, por duhet t’i merrnin me të gjitha kushtet që ata donin. Po ka qeveri, ka ministra që mund të pranojnë të firmosin duke plotësuar të gjitha kushtet e një biznesmeni apo dy biznesmeneve?
Kurrën e kurrës. Kjo ndodh vetëm kur sipërmarrja është e qeverisë. A mundej Klodiani dhe Mireli të firmosnin 17 shkresa për 24 orë?”, është shprehur Berisha.
