Vetëm ditën e diel ndodhën tre aksidente automobilistike në vendin tonë. Muaji korrik është shoqëruar edhe me humbje jete.
Eksperti rrugor, Gëzim Hoxha, në një intervistë për RTSH 24 rendit arsyet e aksidenteve. Sipas tij, shkak bëhen shpesh lëvizja e shtuar e njerëzve për shkak të sezonit turistik, drejtimi i mjetit në gjendje të dehur, amortizimi dhe moskontrolli teknik i makinës.
“Ka shumë njerëz që lëvizin, që vijnë nga vendet e tjera. Ndikim të madh ka edhe rritja e cilësisë së rrugëve, gjithmonë sipas statistikave botërore, sepse njerëzit shkujdesen dhe shtojnë aksidentet. Ka edhe probleme të konsumit të alkoolit,” shpjegon eksperti Hoxha.
Disa nga akset shqiptare janë më problematike për sa i përket aksidenteve.
“Një është aksi Tiranë-Durrës, sepse është më i ngjeshur. Është Lushnja, Fieri…”
Eksperti rrugor thotë se duhet rritur kontrolli mbi mjetet e amortizuara dhe të pakolaudura, të cilat bëhen burim aksidentesh.
“Unë kam parë mjete që qarkullojnë në gjendje të frikshme. Pra me të vërtetë, që në pamje të parë nuk ka nevojë të pyesësh a ke bërë kontrollin teknik apo jo. Janë jashtë çdo kushti teknik,” shton Hoxha.
Sipas ekspertit vetëm gjatë këtij muaji, policia ka arrestuar 270 drejtues mjetesh, prej të cilëve 130 pa leje drejtimi dhe 140 të tjerë ngaqë e drejtonin mjetin në gjendje të dehur.
