Media gjermane jehonë plazheve, maleve dhe kulturës shqiptare
Ndonëse verën e lamë pas, temperaturat e ngrohta vijojnë të nxisin turistë për të vizituar Shqipërinë, ndërkohë mediat e huaja vijojnë të bëjnë jehonë.
Së fundmi, media gjermane “Spiegel” i ka dedikuar një artikull Shqipërisë duke përshkruar vendet më të bukura turistike.
“Plazhe të ngjashme me Karaibe, peizazhe malore spektakolare, bunkerë të zymtë: Shqipëria është ndoshta destinacioni më jokonvencional i udhëtimit në Evropë, por kurrë i mërzitshëm”, me këto fjalë të përzgjedhura nis guida e medias gjermane për Shqipërinë.
Plazhet në Ksamil janë ndër sugjerimet e para. Me palmat dhe rërën e imët, “Spiegel” e përshkruan si një vend tropikal, që duhet të jetë me patjetër në listën e destinacioneve turistike për çdo turist.
“Troja në miniaturë”, Butrinti, përshkruhet si një vend që duhet admiruar, ku mund të mësoni më shumë edhe më historinë e ndërtesave, që herë pas herë janë nën ujë.
Një udhëtim ideal për në vjeshtë do të ishte në Theth. Përveç bukurive natyrore, shkëmbinjtë gëlqerorë rreth Thethit, të japin ndjesinë sikur je në malet Dolomite. Gjirokastra është gjithashtu në listën e destinacioneve më të pëlqyera, ku ndër të tjera gazetari gjerman sugjeron që pamja të shijohet nga kalaja.
Për “Spiegel”, Shqipëria është një destinacion që ia vlen të vizitohet në çdo stinë./ S.M
