Tetori është caktuar si muaji i ndërgjegjësimit për kancerin e gjirit në të gjithë botën, për të rritur vëmendjen dhe mbështetjen për sensibilizimin, zbulimin e hershëm, trajtimin, si dhe kujdesin për këtë sëmundje.
Simbolizuar nga një fjongo e thjeshtë rozë, ajo synon të rrisë ndërgjegjësimin e grave për kancerin e gjirit dhe t’i inkurajojë ato për të kryer kontrolle të vazhdueshme që të kapin në kohë sëmundjen.
Sipas gjetjeve të Observatorit Global të Kancerit të Organizatës Botërore të Shëndetësisë (Globocan) në vitin 2020, nga 25,587 raste të kancerit tek gratë, rreth 32.9% lidheshin me kancerin e gjirit. Kjo është përqindja më e lartë në një lloj kanceri të vetëm në krahasim me llojet e tjera të kancerit me të cilat përballen gratë. Faktori më i zakonshëm i rrezikut për zhvillimin e çdo kanceri është rritja e moshës. Mamografia është në thelb një radiografi e gjirit, të cilën mjekët mund ta përdorin për të zbuluar shenjat e hershme të kancerit të gjirit. Gjiri vendoset midis dy pllakave plastike dhe shtrydhet në mënyrë që të bëhet një skanim i mirë i prerjes tërthore duke përdorur rreze X.
Kjo metodë përdor më pak rrezatim dhe është në përputhje me udhëzimet mjekësore dhe përsëritet nga lart-poshtë dhe anash për çdo gji. Disa gra mund t’i shohin këto procedura të pakëndshme, madje të dhimbshme por është e nevojshme për të parandaluar rrezikun. Kontrollet duhet të bëhen çdo vit, në mes të ciklit menstrual kur gjinjtë janë më pak të ndjeshëm.
Është tepër e rëndësishme që pacientët me kancer të marrin mbështetje të mirë emocionale dhe fizike gjatë gjithë kurimit. Angazhimi në aktivitete fizike, ruajtja e një peshe normale të trupit, si dhe ushqyerja e shëndetshme ndihmojnë në parandalimin e kancerit të gjirit./E.Ç
