As kombëtarja kuqezi nuk i bëri bashkë Edi Ramën dhe Albin Kurtin. Dy kryeministrat kanë ndjekur dy ditë më parë nga afër ndeshjen Shqipëri-Çeki në stadiumin “Air Albania”, por në tribuna të ndara.
Disa orë përpara ndeshjes, Edi Rama u kujdes të deklaronte në Kuvendin e Shqipërisë ku po diskutohej rezoluta për Kosovën se e kishte mik Albin Kurtin. Por, shefi i ekzekutivit shqiptar nuk kurseu as kritikat për të kur tha se në raportet me partnerët ndërkombëtare, Kurti bëri që Beogradi të fitojë pikë përballë Prishtinës.
Duke mbrojtur interesat e “vëllait” të tij, presidentit të Serbisë, Aleksandër Vuçiç, kryeministri Rama theksoi se Kosova duhet të pranojë planin franko-gjerman për asociacionin e komunave serbe dhe sipas tij, kjo marrëveshje është shans historik dhe bazë për arritjen e paqes me Serbinë.
Këto komente por edhe ato për situatën në veriun e Kosovës ku Edi Rama insiston se KFOR duhet të marrë situatën nën kontroll, kanë ftohur edhe më tej raportet mes dy kryeministrave, gjë e cila u dëshmua edhe mbrëmjen e kaluar.
Rama shoqërohet në tribunën VIP ndër të tjera nga bashkëshortja Linda Rama, djali i vogël Zaho, presidenti i FSHF, Armand Duka si dhe ministri i Brendshëm, Taulant Balla.
Ndërkohë që Albin Kurti shihet në llozhën e tribunës, një kat më lart se Rama, së bashku me Lulzim Jasharin, djalin e Adem Jasharit, ministrin e Brendshëm të Kosovës, Xhelal Zveçla, ministren e Infrastrukturës Belinda Balluku si dhe zv/kryeministrin e Maqedonisë së Veriut, Artan Grubi.
Duke qenë në dy tribuna të ndryshme, Rama dhe Kurti kanë shmangur kontaktet mes tyre. Albin Kurti është parë duke festuar golat e kuqezinjve në portën çeke. Në rrjetet sociale ai dhe Lulzim Jashari janë konsideruar si “hajmalia” e kombëtares në këtë sfidë vendimtare për rrugëtimin drejt kualifikimit në Euro2024.
Pas përfundimit të ndeshjes së Shqipërisë në Tiranë dhe Kosovës në Andorra, fitore shqiptare me shifra të njëjta 3:0, Albin Kurti bëri një postim në rrjetet sociale.
“Festë e madhe, sepse fitore e dyfishtë. 3-0 Shqipëria, 3-0 edhe Kosova. Jemi gëzuar e kënaqur të gjithë me këto dy fitore të bukura. Shqipëria drejt EURO 2024, e Kosova me lojë të dalluar. Urime lojtarëve, trajnerëve, tifozëve dhe të gjithë qytetarëve të dy republikave tona“, shkruan Kurti.
Vizita e Albin Kurtit në Tiranë ka zgjatur vetëm disa orë dhe e dedikuar vetëm për kombëtaren. Pas përfundimit të ndeshjes Shqipëri-Çeki, Kurti është rikthyer në Prishtinë pasi agjenda e mëngjesit të kësaj të premte ishte tejet e ngarkuar, duke nisur nga takimet me dy senatorët amerikanë Jeanne Shaheen dhe Peter Welch.
Plasin memet
Por fitorja e thellë e Shqipërisë ndaj Çekisë ka shkaktuar ekzaltim dhe reagime të shumta në rrjet. Komente të shumta ka marrë prania në stadium e kryeministrit të Kosovës, Albin Kurti, i cili e ndoqi ndeshjen i shoqëruar nga zv/kryeministrja, Belinda Balluku.
Në rrjetet sociale nuk mungojnë as memet dhe foto-montazhet ku ironizohet kryeministri Edi Rama, që i qëndroi larg homologut të Kosovës. “Faleminderit që mbështete Kombëtaren, Albin Kurti, kryeministri i Shqipërisë!”, kanë qenë disa nga titujt e publikuar në rrjetet sociale dhe media të ndryshme duke thumbuar kryeministrin Edi Rama./ S.M
