Këtë të hënë është parashikuar të mbahet seanca e radhës plenare, ku priten përsëri debate të forta.
Ndërkohë, 23 deputetë të opozitës janë përjashtuar për 10 ditë nga Kuvendi për shkak të situatës së paprecedentë që ndodhi në seancën e fundit.
Pavarësisht kësaj mase deputetët e opozitës kanë konfirmuar se do jenë të pranishëm dhe të mblidhen para ndërtesës së Parlamentit në orën 16:30 të kësaj të hëne.
“Nesër (sot) e hënë, ora 17:00, është planifikuar seanca e radhës plenare. Pavarësisht vendimit të përjashtimit arbitrar, i cili parashikon përjashtimin tonë për 11 ditë, ne duhet të jemi të gjithë në seancë. Për këtë qëllim, mblidhemi të gjithë bashkë në orën 16:30 për të shkuar në grup në seancë. Ndërkohë, mbledhja e radhës e grupit do të zhvillohet si zakonisht, të martën, datë 31 Tetor, ora 13:00. Ju përshëndes!”, – shkruhet në mesazhin e deputetit Gazement Bardhit.
Deputetët e përjashtuar pretendojnë të bëhen pjesë e seancës pasi sipas tyre afati 10 ditor i përjashtimit ka përfunduar më datë 29 tetor, pra një ditë më parë. Mirëpo, sipas mazhorancës kjo gjë nuk është e vërtetë dhe për këtë qëndrim bazohet te Rregullorja e Kuvendit.
“Kur dita e fundit e një afati bie e shtunë, e diel ose një ditë feste zyrtare, afati mbaron në ditën e punës që vjen pas saj,” shkruhet në fjalinë e dytë të pikës 3 të nenit 121/1./ S,M
