Shqiptarët pritet të kenë 2 deputetë në parlament
Partia Progresive e Aleksandër Vuçiçit triumfoi bindshëm në zgjedhjet e parakohshme parlamentare në Serbi. Teksa mbeten më pak se 5% e votave për t’u numëruar dhe kur rezultati tashmë nuk ka thuajse asnjë mundësi për të ndryshuar, partia e Vuçiçit siguroi 7 deputetë më shumë në zgjedhjet e së Dielës, krahasuar me parlamentaret e vitit të kaluar. Me 127 deputetë që pritet të ketë në parlamentin e ri, progresivët e Vuçiçit mund të qeverisin të vetëm me 2 deputetë më shumë mbi shumicën e nevojshme.
Humbje e rëndë për aleatin e tij, ministrin e Jashtëm, socialistin Ivica Daçiç, një nga zërat më të ashpër kundër Kosovës, deputetët e të cilit gati u përgjysmuan krahasuar me zgjedhjet e 2022-shit duke rënë në 18. Daçiç paralajmëroi dorëheqjen si kryetar i Partisë Socialiste pasi ishte i pakënaqur me rezultatin.
Shqiptarët e Luginës së Preshevës të drejtuar nga Shaip Kamberi, sipas mediave serbe pritet të kenë 2 deputetë, një më shumë se zgjedhjet e 2022-shit.
Grupimi opozitar “Serbia kundër dhunës” siguroi 65 mandate. Megjithatë, ish-presidenti pro-perëndimor Boris Tadiç akuzoi Vuçiçin për manipulim të rezultatit pasi sipas tij në zona të ndryshme të Serbisë, kryesisht në Beograd, janë regjistruar në mënyrë të jashtëligjshme zgjedhës, sidomos serbë të veriut të Kosovës për të mbështetur Partinë Progresive./O.S
