Çdo fillim muaji pensionistët presin datën për të marr pensionin.
Por tërheqja në postë apo përmes bankës është një çështje mjaftë e diskutuar së fundmi, për të cilën vetë pensionistët shprehen të dyzuar.
Për ta mënyra e tërheqjes së pensioneve nuk është problemi kryesor, ajo çka kërkojnë është rritja e tyre.
Te posta jemi më mirë se sa thonë tani që po t’i bëjmë me bankë. Nuk jemi dakord se do rrimë në radhë atje, pensionistët se përdorin dot bankomatin dhe do shkojnë brenda në bankë e do bëhet më shumë radhë. Çmimet janë stratosferë, shkuam të blejmë e kemi karrocën bosh, pensionet duhet të ishin më të larta”, tha një pensionist.
“Më mirë me bankë, po çfarë ti thuash këtij pensioni që marrin ne, është qesharak”, shprehet një tjetër.
“Më mirë te posta se aty edhe qindarkën ta jep”; “Më e lehtë se aty i merr me kartë kur të duash”; “E mira që pensioni të paktën të jetë 300 e lartë”, thanë të tjerë.
Në Shqipëri janë rreth 740 mijë përfitues pensioni, prej të cilëve rreth 666 mijë e marrin atë në postë, ndërsa rreth 74 mijë pensionistë kanë zgjedhur ta marrin në bankë.
Por ka dhe një mënyrë tjetër për ta tërhequr pensionin. Vetëm në Tiranë janë 20 mijë pensionistë të cilët paguajnë 100 lekë çdo muaj, që pensionin t’ia dërgojnë në shtëpi.
“Mua ma sjellin në shtëpi, paguaj 100 lek çdo muaj. Jam 90 vjeçe e sëmurë, nuk shkojë dot ta marr vet”, tha pensionistja.
Qeveria po studion mënyrat se si në vitin e ardhshëm të mundësojë që të gjithë pensionistët ta marrin pensionin me kartë në bankë, pa qenë nevoja që të paguajnë komisione si ajo për hapjen e llogarisë apo për mirëmbajtjen e saj./O.S
