Pasqyrat e reja financiare e regjistrimet në QKB, zbatimi nis në 2025
Komisioni parlamentar për veprimtarinë prodhuese i dha dritën jeshile propozimit të Ministrisë së Financave për disa ndryshime në ligjin për tatimin mbi të ardhurat.
Zëvendësministrja e Financave, Vasilika Vjero listoi ndryshimet të cilat sjell ky ligj i ri, sipas së cilës taksimi i profesioneve të lira do të vijojë për këtë vit me formatet ekzistuese.
“Përfshin ndryshime në pjesën më të madhe të formularëve të regjistrimit të biznesit, në rikategorizimin e tatimpaguesve. Projekt-akti siguron tatimin e profesioneve të lira sikurse është parashikuar në ligj duke filluar nga data 1 janar 2024”.
Drejtori i Përgjithshëm i Tatimeve, Ceno Klosi, u shpreh se me sistemin elektronik është duke u punuar, teksa kërkoi më tepër kohë për informimin e bizneseve.
“2024 në fakt ne do na shërbejë shumë mirë që së pasi ne të bëjmë një transparencë me subjektet të cilët do preken nga ligji i ri sa i përket detyrimit që ata do kenë për herë të parë për tatim-fitimin e shtuar apo tatim-fitimin normal”.
Ky akt normative parashikon që përgjatë vitit 2024 bizneset të vijojnë me deklarimin e pasqyrave të tyre financiare sipas ligjit ekzistues të vitit 2023, ndërkohë që sistemi i ri elektronik me ndryshimet e propozuara të jetë gati në Janar të vitit 2025./O.S
