Sëmundja e njohur në gjuhën popullore si zgjebja po njeh së fundmi përhapje në vendin tonë.
Bluzat e bardha në QSUT konfirmojnë se kjo sëmundje ka qenë gjithnjë e pranishme por së fundmi janë shtuar rastet me këtë patologji.
Por nëse dikur njihej si një sëmundje që prekte personat që nuk ruajnë higjenën personale, sot ndryshon situata, pasi zgjebja prek këdo që bie në kontakt me këtë infeksion.
“Ka filluar të ndryshojë mënyrën e sjelljes ku në përgjithësi skabja është njohur si një parazit që prekte personat që nuk kanë higjenë të mirë personale, tani është ndryshe.
Ajo zgjedh dhe kryesisht janë njerëz që duken se janë shumë të kujdesshëm për higjienën e tyre personale dhe e marrin këtë sëmundje.
Ka ikur ai mentaliteti i sëmundjes së turpshme, është një sëmundje që mund të prek këdo që bie në kontakt me të. Kjo sëmundje prek të gjitha moshat, por më shumë fëmijët, personat që kanë kryer transplante, që janë mbartës të sëmundjeve të tjera si infektive etj”, tregon mjekja Violeta Dajçi, dermatologe në QSUT.
Ky lloj paraziti shfaqet me së shumti në kyçet e duarve, parakrahët etj.
“Kryesisht mjekimi bëhet me anë të kremrave ose pomadave që janë me bazë squfuri ose të permetrinës, që në fakt është edhe emri që shkakton skabjen.
Mjekimi është individual, jo çdo person mjekohet njëlloj. Nganjëherë është vetëm skabja dhe mund të jenë fillimet e saj, por në raste të tjera mund të ketë mbivendosje të organizmave të tjera mikrobial ose të mykrave që e shkaktojnë e përkeqësojnë ose edhe e ngatërrojnë diagnozën”, sqarojnë mjekët./ S.M
